Insomnia reading....
§81
Maiden in the mor lay,
In the mor lay,
Sevenyst fulle
Sevenist fulle.
Maiden in the mor lay,
In the mor lay,
Sevenistes fulle ant a day.
Welle was hire mete:
Wat was hire mete?
The primerole ant the,
The primerole ant the,
Welle was hire mete:
Wat was hire mete?
The primerole ant the violet.
Welle was hire dryng:
Wat was hire dryng?
The chelde water of the,
The chelde water of the,
Welle was hire dryng:
What was hire dryng?
The chelde water of the welle spring.
Welle was hire bour:
Wat was hire bour?
The red rose an te,
The red rose an te,
Welle was hire bour:
Wat was hire bour?
The rede rose an te lilie flour.
§82
Lulley, lulley, lully, lulley,
The fawcon hath born my mak away.
He bare hym up, he bare him down,
He bare hym into an orchard brown.
In that orchard ther was an hall,
That was hanged with purpill and pall.
And in that hall ther was a bede,
Hit was hangid with gold so rede.
And yn that bed ther lythe a knyght,
His wowndes bledyng day and nyght.
By that bedes side ther kneleth a may,
And she wepeth both nyght and day.
And by that bedes side ther stondith a ston,
"Corpus Christi" wretyn theron.
§83
Of on that is so fayr and bright,
Velud maris stella,
Brighter than the dayis light,
Parens et puella,
Ic crie to thee, thou se to me;
Levedy, preye thi sone for me,
Tam pia,
That ic mote come to thee,
Maria.
Levedi, flour of alle thing,
Rosa sine spina,
Thu bere Jhesu hevene king,
Gratia divina;
Of alle thu berst the pris,
Levedi, quene of parays,
Electa,
Mayde, milde Moder,
Es effecta.
Of kare, consell thou ert best,
Felix fecundata;
Of alle wery thou ert rest,
Mater honorata;
Bisek him with milde mod
That for ous alle sad is blod
In cruce,
That we moten komen til him
In luce.
Al this world was forlore
Eva peccatrice,
Tyl our Lord was ybore
De te genitrice:
With Ave it went away
Thuster nyth and comet the day
Salutis,
The welle springet hut of thee
Virtutis.
Wel he wot he is thi sone,
Ventre quem portasti;
He wyl nout werne thee thi bone,
Parvum quem lactasti.
So hende and so god he his
He havet brout ous to blis
Superni,
That haves hidut the foule put
Inferni.